| |
| نەورۆزتان پیرۆزبێت |
|
| 2021-03-20 16:00 |
| فیدراسیۆنی كۆمەڵە کوردستانیەکان لە سوید |
| info@fkks.se |
|
|
پەیامی فیدراسیۆنی كۆمەڵە کوردستانیەکان لە سوید بە بۆنەی جەژنی نەورۆز
هێژایان
فیدراسیۆنی كۆمەڵە کوردستانیەکان لە سوید جەژنی نەتەوەیی نەورۆز لە هەموو گەلی كوردستان پیرۆز دەكات .
مخابن لەبەر ڤایرۆسی كۆرۆنا ، ئەمساڵ وەكو ساڵانی پێشوو ناتوانین جەژنی نەورۆز پیرۆز بكەین ، كە بە هەزاران ڕەوەندی كورد لە هۆڵەكاندا بەبەرنامەیەكی كلتوری و هونەری بە هەڵپەڕكێ و گۆرانی بەشدارییان تێدادەكرد ، لە سەیرانگاکاندا ئاگری نەورۆز دەكرایەوە ، بەڵام هیچ هۆکارێک نیە کە خۆشەویستی و پەرۆشیمان بۆ نەورۆز لە دڵماندا بسڕێتەوە . نەورۆز بۆتە سیمبۆلی بەرخۆدان و ئازادی لە ژیانی گەلی کورد .
نەورۆز جۆش وخرۆشێکی نوێ ئەدات بە گەلی کورد ، خۆشەویستی و ئازادی و ئاشتی لە دڵماندا دەچەسپێنێ .
وەک دەزانن ڤایرۆسی کۆرۆنا زۆر ترسناكە لە سەر ژیانی مرۆڤ ، هەر بۆیە هیوا و داخوازی ئێمە لە گەلەکەمان ئەوەیە ، کۆبوونەوەی بەکۆمەڵ نەکەن ، گەر بشکرێ ، لە 8 کەس زیاتر نەبێت و خۆیان بپارێزن .
خوشک و برایانی خۆشەویست ؛
وڵاتانی داگیرکەر چەندین ساڵە نکۆڵییان لە هەبوونی گەلی کورد کردوە ، زمان و کولتووری ئێمەیان قەدەغە کردوە ، لەسەر داوای مافە ڕەواكانی خۆمان ، زیندانی كراوین وئەشکەنجە و سزا دراوین .
لە دێرسم ، لەگەلی زیلان ، لە بارزان ، ئەنفال ، هەڵەبجە و لە شەنگال کۆمەڵکوژ کران . لە باشووری کوردستان حکومەتێکی فیدراڵ هەیە . پێویستە هەموو پارتەکانی کوردستان ڕێز لە سەروەری باشووری کوردستان بگرن ، زەمینە بۆ هێرشی دوژمن بۆ سەر خاکی کوردستان خۆش نەكەن .
پشتیوانی لە ڕێککەوتنی شەنگال لە نێوان حکومەتی هەرێمی کوردستان و بەغدا بكەن .
کورد لە هەموو بەشەکانی کوردستان نەبێتە داردەستی هیچ ووڵاتێكی داگیركەر و فشاری هیچ وڵاتێک لەسەرخۆی قبوڵ نە كات . پێویستە کورد یەکڕیزی نەتەوەیی و نیشتمانی خۆی بپارێزێت .
حکومەتی ئاکەپە و هاوکارەکەی مەهەپە لە باکوری کوردستان دژایەتی بوونی کورد دەکەن و بە بیانووی توندوتیژی باری نائاسایی لە کوردستان ڕاگەیاند ،
هەر کەسێک دژی دەسەڵاتی ئاکەپە و ئەردۆغان بێت دەستگیر دەکرێت . زیندانەکان پڕن لە ڕۆشنبیر و سیاسەتمەدار ، ڕژێمی تورکیا وەنەبێ تەنیا هەرەشە بێت بەسەر کوردانی باکوور ، بەڵکو هەرەشەشە بۆ سەر پارچەکانی دیکەی کوردستان .
دوای سەرکەوتنی ڕیفراندۆم بۆ سەربەخۆیی باشووری کوردستان ، تورکیا و ئێران و عێراق لە دژی کورد ڕێککەوتن و هێرشیان کردە سەر کەرکووک ، ئیدارەی کەرکووک لە کوردان سەندرایەوە ، دەوڵەتی تورکیا عەفرین و سەرێ کانی داگیرکرد . هێرش و داگیرکردنی عەفرین بەردەوامی پیلانی داگیرکردنی کەرکووک بوو.
بێدەنگی وڵاتانی ڕووسیا ، ئەمەریکا و ئەورووپا ، هاندەربوون بۆ ئەوەی ڕەجەب تەیب ئەردۆغانی سەرۆک کۆماری تورکیا هیچ هەستێکی مرۆڤایەتی نەمێنێ .
تورکیا لەڕێگای ئەو سیاسەتی ڕەگەزپەرستانەیەوە دەیەوێت ڕۆژئاوای کوردستان بەعەرەب بکات و دیموگرافیای ئەو پارچەیە بگۆڕن .
بەڵام گرنگترین شت یەکڕیزی و ماڵی کوردانە . دەبێت ڕێککەوتننامەی هەولێر و دهۆک ببێتە بنەمای ڕێکەوتنی پارتەکانی ڕۆژئاوای کوردستان . ئەگەر کورد لەناوخۆیدا یەکریزی و یەکهەڵوێست بێت ، هیچ هێزێک ناتوانێت لە دژی کورد بوەستێتەوە !
نابێت ئەوەشمان لەبیر بچێت کە ژەهراویترین دوژمنی کورد ڕژێمی خوێناوی ئێرانە . ئێران پشتیوانی هەموو هێزە تیرۆریستەکانە لە ناوچەکەدا .
زیندانیکردن و لەسێدارەدانی وڵاتپارێزانی کورد بووەتە کاری ڕۆژانەی ڕژێمی ئێران .
دووبارە نەورۆزتان پیرۆزبێت
فیدراسیۆنی کۆمەڵە کوردستانییەکان لە سوید
2021-03-21 |
|
