| |
| رێز له ده‌ستوور بگرن |
|
| 2010-09-08 23:00 |
| Pirşing |
| pirshang_t@hotmail.com |
|
حكومه‌تی هه‌رێمی كوردستان داوای له لایه‌نه سیاسییه عێراقییه‌كان ده‌كات بگه‌نه رێككه‌وتنێك بۆ پێكهێنانی حكومه‌تی نوێی عێراق و رێز له ده‌ستوور بگرن و به‌رژه‌وه‌ندی خه‌ڵك ره‌چاو بكه‌ن.
كاوه مه‌حموود گوته‌بێژی حكومه‌تی هه‌رێم دووپاتی له‌سه‌ر گرنگی پێكهێنانی حكومه‌ت له نزیكترین كاتدا كرده‌وه و ئاماژه‌ی به‌وه‌دا كه 6 مانگ تێپه‌ڕیوه به‌سه‌ر ئه‌نجامدانی هه‌ڵبژاردنه‌كانی په‌رله‌مانی عێراق، كه‌چی تا ئێستا حكومه‌تی نوێ پێكنه‌هاتووه، ئه‌مه‌شی به‌پێشێلكردنی ده‌ستووری عێراق وه‌سف كرد.
هه‌روه‌ها رایگه‌یاند "حكومه‌تی هه‌رێمی كوردستان دوای تێپه‌ڕبوونی شه‌ش مانگ به‌سه‌ر هه‌ڵبژاردنه په‌رله‌مانییه‌كه‌ی عێراقدا داوا له قه‌واره سیاسییه‌كان ده‌كات په‌له بكه‌ن له پێكهێنانی حكومه‌ت". گوتیشی حكومه‌ته‌كه‌ی هه‌میشه هه‌وڵ ده‌دات بۆ نزیككردنه‌وه‌ی راوبۆچوونی لایه‌نه سیاسییه جیاوازه‌كان.
كاوه مه‌حموود هیوای خواست سیاسییه‌كان بگه‌نه چاره‌سه‌رێكی ته‌وافوقی و رێز له ده‌ستوور بگرن و به‌رژه‌وه‌ندی خه‌ڵك ره‌چاو بكه‌ن و سامانی عێراق بۆ به‌رژه‌وه‌ندی خه‌ڵكه‌كه‌ی به‌كاربێنن.
|
|
