| |
| باشوری كوردستان وهیوایەك بۆ سەربەخۆیی |
|
| 2020-12-13 19:00 |
| فیدراسیۆنی كۆمەڵە کوردستانیەکان لە سوید |
| info@fkks.se |
|
| باشوری كوردستان و هیوایەک بۆ سەربەخۆیی
خۆپێشاندان مافی هاوڵاتیانە ئەگەر بەشێوەیەکی یاسایی ڕێگەپێدراوبێت و دووربێت لە بەکارهێنانی توند و تیژی ، هەروەکو چۆن لەهەر وڵاتێکی پێشکەوتوودا ڕێکدەخرێت و بەڕێگایەکی ئاشتیانە داواکاریەکانیان دەگەیەننە ئەو جێگایەی کە مەبەستیانە .
ئەوەی لەو چەند ڕۆژەدا لەخۆپێشاندانەکانی باشووری کوردستان بەدی دەکرێ ، لە سووتاندنی دامودەزگا حکوومیەکان و شەهیدکردنی ئەو پێشمەرگە و پۆلیس و ئەفسەرانەی کە بەرگری لەخاکی کوردستان دەکەن و بەتاڵان بردنی موڵکی بارەگا حیزبیەکان ، لەخۆپێشاندانی ئاشتیانە دەرچوە و ڕێچکەی توند و تیژی بەخۆوە گرتوە کە هیچ کاتێکیش بەو شێوازە مافەکان دەستەبەر ناکرێت .
ئەمڕۆ باشووری کوردستان بەهەلومەرجێکی دژواردا تێدەپەڕی ، حکوومەتی بەغدا بەمەبەستی ئاژاوە نانەوە و بەرپاکردنی دووبەرەکی بودجەی هەرێمی کوردستانی بڕیوە ، دوژمنان چاویان بەو پێشکەوتنەی هەرێمی کوردستان هەڵنایە و ئەوەی کە لەکەرکووک و ناوچە کوردستانیەکانی دەرەوەی ئیدارەی هەرێم دەکرێ لەبەعەرەب کردن و سووتاندن و دەست بەسەراگرتنی موڵک و ماڵی گوندنشینەکان ، پیلانێکی دوژمنانە و پێویستە کورد هەمووی یەکگرتووبێت و بەیەکگرتوویش بەرەنگاری ئەو مەترسیانە ببێتەوە کە ڕووبەڕووی حکوومەتی کوردستان بوونەتەوە .
فیدراسیۆنی کۆمەڵە کوردستانیەکان خۆپێشاندان بەمافێکی ڕەوای خەڵکی کوردستان دەبینێ بەمەرجێ بەشێوەیەکی ئاشتیانە و دوور لەتوندوتیژی بێت ، فیدراسیۆن داوادەکات بە یەک هەڵوێستی و یەکدەنگی و یەکڕیزی ماڵی کورد ئەو ئەزموونەی باشووری کوردستان بپارێزن کە هەنگاوێکە بۆ گەیشتن بەو ئامانجانەی کە گەلەکەمان ساڵانێکە خەباتیان لەپێناودا دەکات .
فیدراسیۆنی كۆمەڵە کوردستانیەکان لە سوید |
|
