|
داخویانی |
|
2014-08-07 01:00 |
فیدراسیۆنی کۆمەڵە کوردستانیەکان لە سوید |
info@fkks.se |
|
لەوکاتەی کە حکوومەتی کوردستان لەهەوڵی سەربەخۆیی ئابووری دابوو و سەرقاڵی ڕیفراندۆم بوون بۆ سەربەخۆیی کوردستان ، کوردانی ئێزیدی لە ناوچەکانی شنگال و زوممار،هەروەها کریستیان و شەبەک لە ناوچەی تلکێف وقەرەقۆش ، بە پلانێکی داڕێژراو دووچاری کۆمەڵکوژیەکی تر دەبنەوە کە لەلایەن تیرۆرستانی داعشەوە بەئەنجام دەدەرێ . ئەوەی ئەمڕۆ لەو ناوچانە ڕوودەدەن ، کارەساتێکی مرۆیی و کۆمەڵایەتی و نەتەوەییە و لەئاکامدا ژیانی هەزاران لە ژن و منداڵ و پەککەوتە لەمەترسیدان و چاوەڕێ ی هەوڵ و هیممەتی هەموولایەکن بۆ ڕزگاری کردنیان لە مردن .هەروەها فیدراسیۆنی کۆمەڵە کوردستانیەکان لەسوید ، وێڕای دەستخۆشی لە خۆڕاگری پێشمەرگە نەبەردەکان لەبەرەکانی شەردا ، ئەوە لەهەمان کاتیشدا زۆر بەتوندی کردارە تیرۆرستەکانی داعش ڕیسوا و شەرمەزار دەکات ، داوا لە سەرۆکایەتی هەرێم و پەرلەمان و حکوومەت و هەموو لایەنە سیاسیەکانی کوردستان و ڕێکخراوە ناوخۆیی و نێودەوڵەتیەکان و نەتەوە یەکگرتوەکان دەکەین کە هەرچی زووە چارەسەرێک بۆ ئەو کارەساتە تراژیدیە بدۆزنەوە و بەهەر ڕێگایەک بێت هاوکاری بگەیەننە هەموو ئاوارەکان ، بەتایبەتی ئەوانەی کە لەچیاکانی شنگال گیریان خواردوە و چەند ڕۆژێکە بەبێ ئاو و نان ژیان بەسەردەبەن . هەر لێرەشدا ، فیدراسیۆنی کۆمەڵە کوردستانیەکان لەسوید ، پرسە و سەرەخۆشی ئاراستەی خێزانی شەهیدەکان دەکات ، بەتایبەتی ئەوانەی کە لەئاوەرەییدا گیانیان لەدەست داوە ، هیوای چاکبوونەوەش بۆ بریندار و نەخۆشەکان دەخوازین . نەمری بۆ شەهیدان و مردن و سەرشۆڕی بۆ تیرۆرستانی داعش بژی کوردستان فیدراسیۆنی کۆمەڵە کوردستانیەکان لە سوید 2014 / 8/6
|
|